Şu ýyl ýurdumyzyň sport senenamasyna altyn harplar bilen ýazylan pursatlaryň ençemesini bagyş etdi. Paýtagtymyz Aşgabadyň «Arkalaşygyň täze sport mümkinçilikleriniň şäheri» diýlip yglan edilmegi, Aziýanyň Tennis federasiýasynyň Baş Assambleýasynda Türkmenistanyň Tennis federasiýasynyň Aziýanyň iň çalt ösýän guramalarynyň biri hökmünde ykrar edilmegi, BMG-niň Baş Assambleýasynyň 78-nji sessiýasynda Türkmenistanyň başlangyjy bilen «Birleşen Milletler Guramasynyň oýunlary» atly Kararnamanyň kabul edilmegi Garaşsyz Diýarymyzyň halkara abraýynyň barha belende galýandygynyň nobatdaky subutnamasy boldy. Şu hoş habar mynasybetli, hormatly Prezidentimiziň başlangyjy bilen 2-nji noýabrda Saglyk ýolundan köpçülikleýin geçilmegi, ýylyň dowamynda halkara ýaryşlarda ýaşyl tugumyzy belentde parladan türgenlerimiziň dabaraly ýagdaýda sylaglanmagy göwünleri galkyndyrdy. Türgenlerimiziň yzygiderli gazanýan üstünlikleri döwlet tarapyndan üns-alada bilen gurşalýandygynyň miwesidir. Munuň şeýledigine paýtagtymyzdaky Olimpiýa şäherçesiniň döwrebap Tennis toplumynda dowam edýän «Ashgabat Open 2024» halkara tennis ýaryşynda-da şaýat bolduk.
Gatnaşýan türgenleriň 14 ýaşa çenli ýetginjek oglan-gyzlardygy biziň bu ýaryşa gyzyklanmamyzy has-da artdyrýar. Sebäbi olaryň ählisi mekdep ýaşyndaky türgenler, ýurdumyza wekilçilik edýänleriň aglabasy paýtagtymyzyň mekdepleriniň okuwçylary. Sportuň tennis görnüşinde oglan-gyzlarymyzyň Beýik Britaniýadan, Hindistandan, Eýrandan, Iordaniýadan, Gazagystandan, Malaýziýadan, Birleşen Arap Emirliklerinden, Pakistandan, Täjigistandan, Türkiýeden, Özbegistandan gelen türgenler bilen bäsleşip, üstünlik gazanmaklary buýsandyrýar.
