«Pähim-paýhas ummany Magtymguly Pyragy» ýylynyň güýzi türkmen topragyna ýene bir hoş habary alyp geldi. 8-nji noýabrda hormatly Prezidentimiz Serdar Berdimuhamedow BMG-niň Bosgunlaryň işi baradaky Ýokary komissarynyň kömekçisi hanym Ruwendrini Menikdiwelany kabul etdi. Myhman döwlet Baştutanymyza BMG-niň Bosgunlaryň işi baradaky Ýokary komissarynyň müdirliginiň Türkmenistanda raýatsyzlygy aradan aýyrmak boýunça gazanylan üstünlikleri tassyklaýan degişli güwänamany gowşurdy. Bu üstünlik Garaşsyz Diýarymyzda ýyllaryň dowamynda hemmeler üçin raýatlyga bolan hukuklary goramak boýunça yzygiderli alnyp barlan işleriň miwesidir.
Türkmenistan özüniň daşary syýasatynda Birleşen Milletler Guramasy bilen hyzmatdaşlyga aýratyn üns berýär. Bu guramanyň çäklerinde dünýä döwletleri bilen alnyp barylýan dostlukly gatnaşyklaryň miwesi bolsa ýyllaryň dowamynda gazanylan netijelerde öz beýanyny tapýar. BMG bilen hyzmatdaşlygyň çäklerinde ýurdumyz adam hukuklaryny we azatlyklaryny üpjün etmek boýunça sebit maksatnamalaryny we hereket etmegiň meýilnamalaryny durmuşa geçirmäge işjeň gatnaşýar. Ýurdumyzyň 2011-nji ýylda BMG-niň Apatridleriň statusy hakynda, 2012-nji ýylda Bosgunlaryň statusy hakynda we Raýatsyzlygy azaltmak hakynda Konwensiýalaryna goşulmagy bu işde täze gözýetimleri açdy. Bosgunlary we raýatlygy bolmadyk taraplary raýatlyga kabul etmek boýunça ýurdumyzda ýyllaryň dowamynda gazanylan netijelerde Gahryman Arkadagymyzyň öňdengörüjilikli garaýyşlarynyň orny uludyr. Milli Liderimiziň başlangyjy boýunça BMG-niň bosgunlaryň işi boýunça Ýokary komissarynyň dolandyryş edarasy bilen hyzmatdaşlykda Türkmenistanda raýatlygy bolmadyk ähli taraplaryň hasaba alynmagy geçirildi we raýatlygy bolmadyklary kemeltmek hem-de raýatsyzlygyň öňüni almak boýunça netijeli ädimler kabul edildi. Şeýlelikde, müňlerçe adam Türkmenistanyň Prezidentiniň Permany bilen ýurduň raýatlygyny aldy. Gahryman Arkadagymyzyň başlangyjy bilen 2012-nji ýylyň maýynda paýtagtymyzda geçirilen «Musulman dünýäsiniň bosgunlary» atly 1-nji halkara maslahat Türkmenistanda bu ugurda nusgalyk işleriň alnyp barylýandygyny aýdyň görkezdi.
