Ýurdumyzda giňden belleniljek Halkara Bitaraplyk güni we Garaşsyz Watanymyzyň hemişelik Bitaraplygynyň 29 ýyllyk baýramy mynasybetli «Aşgabat» gazetiniň redaksiýasy Türkmenistanyň Magtymguly adyndaky Ýaşlar guramasynyň Aşgabat şäher geňeşi bilen bilelikde «Bitaraplyk — bagtymyz» atly döredijilik bäsleşigini yglan edýär.
Bäsleşigiň esasy maksady hemişelik Bitarap Türkmenistanyň alyp barýan hoşniýetli syýasatyny, Bitaraplygyň türkmen halkyna eçilen bagtyny, parahat, asuda, bolelin we gülleýän durmuşy, dost-doganlyk we goňşuçylyk gatnaşyklaryny, parahatçylyk söýüjilik, hoşniýetlilik we ynsanperwerlik ýörelgelerini, durmuşyň ähli ugurlarynda gazanylýan üstünlikleri, gözel Diýarymyzyň ýeňişlerini ýaýmakdan, wasp etmekden, döredijilik bilen meşgullanýan zehinli ýaşlary, çeper söz ussatlaryny ýüze çykarmakdan ybaratdyr. Hormatly Prezidentimiziň «Biziň Bitaraplygymyz dünýä halklaryny belent maksatlara birleşdirýän, parahatçylygy hem-de dost-doganlygy ösdürýän ýörelgämizdir» diýip belleýşi ýaly, Garaşsyz Watanymyzyň şanly Bitaraplygynyň 29 ýyllygy uly zähmet üstünlikleri, şatlyk hem dabaralar bilen ýurdumyzda ýokary derejede bellenilip geçiler. Biz hemişelik Bitaraplyk hukuk ýagdaýymyza, bar bolan mümkinçiliklerimize esaslanyp, geljekde-de Garaşsyz döwletimizi dünýäniň öňdebaryjy, gülläp ösýän dostlukly ýurduna öwürmek ugrunda ähli tagallalary etmelidiris.
