Ýaňy-ýakynda Gökdepe şäheriniň Medeniýet köşgünde halypa sazanda, mukamçy kompozitor Täçmämmet Suhangulyýewiň doglan gününiň 160 ýyllygy mynasybetli döredijilik agşamy guraldy. Türkmenistanyň Medeniýet ministrliginiň Maddy däl medeni miras müdirliginiň hem-de Ahal welaýat Medeniýet müdirliginiň guramagynda geçirilen bu döredijilik agşamyna ýurdumyzyň meşhur sazandalary, bagşylary, sazşynaslary, medeniýet we sungat işgärleri gatnaşdylar. Gökdepe etrabynyň medeniýet merkeziniň režissýory Nurmuhammet Annaýew döredijilik agşamyny dabara bilen açdy we milli aýdym-saz sungatymyzyň ägirt halypalaryna çuňňur sarpa goýýan Gahryman Arkadagymyza hem-de Arkadagly Gahryman Serdarymyza köňül hoşallygyny beýan etdi. Soňra halypa sazşynas Amanöwez Saparowa söz berildi. Halypa Täçmämmet Suhangulyýewiň ömri-döredijiligi we döreden saz eserleri hakynda giňişleýin gürrüň berdi.
