UEFA-nyň täze döredilen ligasy Ýewropa Konferensiýa ligasynyň ilkinji möwsüminiň toparçalarynyň bijeleri çekildi. 32 klubuň gatnaşýan ýaryşynda toparlar 8 toparça bölündi. Bu ýaryşa milli çempionatlarynda 6–7-nji orny eýelänler, şol sanda Ýewropa ligasynyň saýlama tapgyrlarynda şowsuz bolan klublar gatnaşýar. UEFA-nyň sanawynda aşaky orunlarda bolan çempionatlaryň klublarynyň has-da kämilleşmegi üçin döredilen ýaryşyň iň esasy topary meşhur tälimçi Žoze Mourinionyň häzirki hem-de öňki klublary bolup, olar «Roma» bilen «Tottenham» toparlarydyr. Şeýle-de, ildeşimiz Gurban Berdiýewiň tälim berýän topary «Kaýrat» hem ýaryşa gatnaşýar. «Roma» «C», «Tottenham» «G» toparçada çykyş etse, «Kaýrat «H» toparçada «Bazel», «Karabag» hem-de «Omonia» toparlary bilen bije çekişdi.
«Alaşkert» (Ermenistan), «Budýo-Glimt» (Norwegiýa), «Flora» (Estoniýa), «Kaýrat» (Gazagystan), «Linkoln Red Imps» (Gibraltar), «Mura» (Sloweniýa), «Ranners» (Daniýa) hem-de «Union Berlin» (Germaniýa) klublary ilkinji gezek UEFA-nyň ýaryşlarynda toparçalarda çykyş eder. Şol bir wagtyň özünde Ermenistandan, Estoniýadan hem-de Gibraltardan bir klub UEFA-nyň ýaryşlarynyň toparçalaryna ilkinji gezek gatnaşýarlar.
