«Pähim-paýhas ummany Magtymguly Pyragy» ýylymyzyň her güni, her sagady taryhy wakalardan doly. Şol wakalar özüň bilen hem baglanyşykly bolanda ol aýratyn many-mazmuna eýe bolýar. 2024-nji ýylyň 10-njy dekabrynda bagtyýar ildeşlerimiziň birnäçesi bilen birlikde Türkmenistanyň «Magtymguly Pyragynyň 300 ýyllygyna» atly ýubileý medaly bilen sylaglanmagym meniň üçin ýatdan çykmajak pursat boldy.
Arkadagly Gahryman Serdarymyzyň Permanyndaky: «Berkarar döwletiň täze eýýamynyň Galkynyşy döwründe ýurdumyzyň medeniýet ulgamyny ösdürmekde, halkymyzyň asyrlardan gözbaş alýan medeni mirasyny, ruhy gymmatlyklaryny dikeltmekde, nusgawy şahyr Magtymguly Pyragynyň döredijilik mirasyny öwrenmekde, aýawly saklamakda, wagyz etmekde hem-de geljekki nesillere ýetirmekde bitiren aýratyn hyzmatlary üçin... » diýen sözleri okanyňda başyň asmana ýetýär.
