Türkmen sportunyň taryhyny bezejek buýsandyryjy netije
Şu günler bütin dünýäniň nazary Ýaponiýanyň paýtagty Tokioda geçirilýän XXXII tomusky Olimpiýa oýunlarynda eglenýär. Ajaýyp sport baýramçylygyndan mynasyp «toý paýyny» almak — dürli röwüşli medallary gazanmak arzuwy bilen dünýäniň çar ýanyndan gelen türgenleriň gatnaşmagyndaky gyzgalaňly ýaryşlar millionlarça adamy mawy ekranyň öňünde jemleýär. Sport bilen azda-kände gyzyklanýan her bir adam Olimpiýa oýunlarynyň çäklerinde geçirilýän bäsleşikleriň iň bolmanda netijeleri bilen gyzyklanýar. Öňňin — 27-nji iýulda Tokio Olimpiadasyndaky ýaryşlarda gazanylan netijeleriň biri türkmen sportunyň taryhyna zer harplar bilen ýazylyp, ähli ildeşlerimiziň kalbyny bimöçber buýsanç duýgularyna besledi.
