Kitaplar adamzat ösüşiniň, onuň kämillige ýetmeginiň ilkinji basgançagydyr. Kitap ähli ylymlaryň açary hasaplanýar. Ýakynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Ömrümiň manysynyň dowamaty» atly edebi-filosofik eseriniň ýapon dilinde neşir edilmegi Türkmenistanyň we Ýaponiýanyň arasyndaky dostlukly gatnaşyklaryň taryhynda şanly waka öwrüldi. Gahryman Arkadagymyzyň bu kitaby türkmen halkynyň taryhyna has giňişleýin garamaga, dünýäniň ylmy, ykdysady, medeni ösüşine goşan uly goşandyna düşünmäge, halkymyzyň milli özboluşlylygy, däp-dessurlary, durmuş ýörelgeleri bilen tanyşmaga mümkinçilik berýär.
Kitabyň Sukuba uniwersiteti tarapyndan ýapon diline terjime edilendigi aýratyn bellenilmäge mynasypdyr. Mälim bolşy ýaly, 2015-nji ýylyň martynda Ýaponiýada iş saparynyň dowamynda Gahryman Arkadagymyz Gurbanguly Berdimuhamedowa bilim, ylmy barlaglary geçirmek ulgamynda özara alyşmalar boýunça halkara okuw maksatnamasyna ýardam berendigi üçin Sukuba uniwersitetiniň hormatly doktory diýen alymlyk derejesi berlipdi. Geçen ýylyň sentýabrynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen bolan duşuşygynda Sukuba uniwersitetiniň prezidenti Kýosuke Nagata «Ömrümiň manysynyň dowamaty» atly kitapda Ýaponiýa hakynda ençeme maglumatlaryň ýerleşdirilendigini, hususan-da, häzirki döwürdäki türkmen-ýapon gatnaşyklary barada bellenilýändigini aýdypdy. Şonda ol many-mazmun taýdan täsirli bu kitaby ýapon diline terjime etmek isleginiň bardygyny beýan edip, munuň iki halkyň has-da ýakynlaşmagyna, özara düşünişmegine ýardam berjekdigine ynam bildiripdi. Bu kitabyň ýapon diline terjime edilmegi alys ýurtdaky okyjylary halkymyzyň umumadamzat ähmiýetli taryhy, baý medeniýeti, täsirli durmuş filosofiýasy, dünýägaraýşy, parasatly öwüt-ündewleri bilen tanyşdyrar.
