«Çelsi» ýyldyzlaryny bäsdeşlerine ugratdy
«Premier Ligada» möwsümi juda şowsuz tamamlan «Çelsi» kluby elindäki ýyldyzlary birin-birin ugratmagyny dowam edýär. Köp wagtdan bäri «Mançester Ýunaýted» bilen ady agzalýan Meýson Maunt hem klubdan gaýdanlaryň hataryna goşuldy. 24 ýaşyndaky hawbek özüni 5 ýyllap «Mançester Ýunaýtede» baglaýan şertnama gol çekdi. «Mançester Ýunaýted» topary ýarymgoragçynyň transferi üçin «Çelsi» klubuna 55+5 million funt sterling tölär. Ýyldyz oýunçy täze klubundan hepdelik 250-300 müň funt sterling hak alar. «Çelside» futbola başlan Maunt «Witesse» hem-de «Derbi Kaunti» klublarynda kärendesine çykyş etdi. Ol «Çelside» 4 möwsümde 195 oýunda 33 gol geçirdi. Maunt Angliýanyň ýygyndysynda-da 36 gezek meýdança çykyp, 5 gezek tapawutlandy. Meýson Maunt täze klubunda ozal Jorj Best, Braýan Robson, Erik Kantona, Dewid Bekham hem-de Kristiano Ronaldo ýaly ägirtleriň, rowaýatylaryň geýen 7-nji belgili köýnekçesini geýer.