Polşanyň Krakow hem-de Malopolska şäherlerinde geçirilen 3-nji Ýewropa oýunlary tamamlandy. Yklymyň 48 döwletinden 6 müň 857 türgeniň gatnaşan oýunlarynda sportuň 29 ugry boýunça 254 ýaryş geçirildi. Bu ýaryşyň çägindäki käbir sport görnüşlerinde gazanylan başarnyk käbir türgenlere geljek ýyl Parižde geçiriljek tomusky Olimpiýa oýunlaryna gatnaşmaga ygtyýar berdi. Geçirilen ýaryşlarda çempionatyň birnäçe rekordy täzelendi.
Medallaryň sanawynda Italiýanyň ýygyndysy 1-nji orny eýeledi. Italiýaly türgenler 35 altyn, 26 kümüş, 39 bürünç, jemi 100 medal gazandylar. 2-nji ýere 21 altyn, 17 kümüş, 19 bürünç, jemi 57 medal gazanan Ispaniýa mynasyp boldy. 21 altyn medal gazanan ukrainler ispanlara garanyňda azrak kümüş medal gazanyp, 3-nji orny eýelediler. Olar 12 kümüş, 8 bürünç, jemi 41 medala eýelik etdiler. Germaniýadan wekilçilik eden türgenler 20 altyn, 16 kümüş, 27 bürünç, jemi 63 medal bilen 4-nji, Fransiýanyň türgenleri-de 17 altyn, 19 kümüş, 26 bürünç, jemi 62 medal bilen 5-nji orna mynasyp boldular. Ýer eýeleri polýaklar 13 altyn, 19 kümüş, 18 bürünç, jemi 50 medal gazanyp, 6-njy orunda tamamladylar. 35 ýurduň wekili azyndan 1 altyn, şol sanda 41 ýurduň türgeni-de 3-nji Ýewropa oýunlarynda azyndan 1 medal gazanmagy başardy.