PSŽ toparynyň braziliýaly super ýyldyzy Neýmar agyr jerimä sezewar boldy. Oňa ýurdy Braziliýadaky mülk ýerinde daşky gurşawy bozandygy üçin 3,5 million dollarlyk jerime salyndy. Ol öz mülk ýerinde emeli köl döredip, daşky gurşawy goramagyň düzgünleriniň 4-sini bozupdyr. Ýagny oňa daşky gurşawa degişli işleriň rugsatsyz edilmegi, derýanyň suwunyň birugsat alynmagy hem-de ugrunyň üýtgedilmegi, şeýle-de, ýeriň gazylyp, ösümlikleriň üýtgedilmegi ýaly eden bidüzgünçilikleri üçin agyr jerime salyndy. Sebitiň geňeşi jerimäniň tassyklanandygyny mälim etdi. Neýmaryň mülk ýeri Rio de Žaneýro şäherine 130 kilometr daşlykdaky syýahatçylyk zolagynda ýerleşýär. Neýmaryň bu mülk ýerinde emeli kölden başga-da, dikuçar üçin ýörite meýdança, ýüzüş howzy, SPA hem-de kiçeňräk sport zaly bar.