Hormatly Prezidentimiziň taýsyz tagallasy bilen ata Watanymyzyň daýanjy bolan ýaş nesliň arassa ahlakly, ýokary adamkärçilikli, bilimli, maksada okgunly adamlar bolup ýetişmekleri babatda ähli şertler döredilýär. Ýaşlar özleriniň boş wagtlaryny peýdaly geçirýärler. Olar sport we köpçülikleýin bedenterbiýe bilen yzygiderli meşgullanýarlar, bedenlerini taplaýarlar, pikirlenmek ukyplaryny ösdürýärler, ýurdumyzyň sport abraýynyň artmagyna goşant goşýarlar. Şonuň üçin hem ýaşlaryň berk bedenli, sagdyn ruhly, kämil şahsyýetler bolup ýetişmeklerini gazanmak maksady bilen dürli çäreler geçirilip durulýar.
«Türkmennebit» döwlet konserniniň Balkanabat nebitçilik orta hünär okuw mekdebinde TMÝG-niň Balkanabat şäher Geňeşiniň hem-de Türkmenistanyň Agrar partiýasynyň Balkan welaýat komitetiniň bilelikde guramagynda wagyz-nesihat çäresi geçirildi. «Sagdynlyk — bagtyýarlyk» ady bilen geçirilen wagyz-nesihat duşuşygyna mekdebiň talyp ýaşlary we mugallymlary gatnaşdylar. Duşuşykda çykyş edenler sagdyn durmuş ýörelgesiniň ähmiýeti barada giňişleýin gürrüň berip, türkmen ýaşlarynyň bagtyýar durmuşda ýaşamagy we ruhubelent bolmagy üçin döwlet derejesinde alada edilýändigini buýsanç bilen beýan etdiler.