2023-nji ýylyň 19–20-nji martynda Türkmenistanyň Prezidenti Serdar Berdimuhamedow döwlet sapary bilen Katarda boldy. Bu gezekki sapar dostluk we birek-birege hormat goýmak ýörelgelerine esaslanýan, özara bähbitli türkmen-katar hyzmatdaşlygynyň ösdürilmegine, bar bolan mümkinçilikleriň iş ýüzünde durmuşa geçirilmegine gönükdirilen döwletara gatnaşyklaryň taryhynda täze sahypa öwrüldi.
Häzirki wagtda Türkmenistanyň Katar Döwleti bilen hyzmatdaşlygy dostluk däpleriniň, birek-birege hormat goýmak ýörelgeleriniň esasynda ähli ugurlar boýunça üstünlikli ösdürilýär. Iki ýurduň arasyndaky diplomatik gatnaşyklar 1996-njy ýylyň noýabr aýynda ýola goýuldy. Hormatly Prezidentimiziň bu ýurda nobatdaky saparynyň çäklerinde Doha şäherinde Türkmenistanyň Katar Döwletindäki ilçihanasynyň açylmagy döwletara gatnaşyklaryň hil taýdan täze many-mazmun bilen baýlaşdyrylmagyna ýardam etdi.