Türkmenistanda hem Özbegistanda dabaralandyrylýar
Hormatly Prezidentimiz Serdar Berdimuhamedowyň baştutanlygynda alnyp barylýan ýurdumyzyň daşary syýasat strategiýasynda ýakyn goňşy ýurtlar, şol sanda Özbegistan Respublikasy bilen hemmetaraplaýyn hyzmatdaşlygy ösdürmäge aýratyn ähmiýet berilýär. 1993-nji ýylyň 7-nji fewralynda diplomatik gatnaşyklara resmi taýdan badalga berilmegi bilen, Türkmenistan bilen Özbegistanyň arasynda dostluga, hoşniýetli goňşuçylyga, özara ynanyşmaga esaslanýan netijeli gatnaşyklar ýola goýuldy. Bu gün ähli ugurlarda depginli ilerledilýän türkmen-özbek hyzmatdaşlygy ösüşiň iň ýokary derejesi bilen tapawutlanýar. Häzirki wagta çenli hereket edýän halkara resminamalaryň 300-e golaýy ikitaraplaýyn gatnaşyklaryň şertnama-hukuk binýadyny emele getirip, hyzmatdaşlygy ileri tutulýan ugurlarda has-da giňeltmek üçin ygtybarly esas bolup hyzmat edýär.
