Täjigistanyň Milli Ylymlar Akademiýasynyň mejlisler zalynda «Täjigistan Respublikasynyň we Türkmenistanyň ylmy edaralarynyň arasyndaky ylmy-tehniki hyzmatdaşlygyň ösüşi» diýen tema boýunça «tegelek stoluň» başynda halkara maslahat geçirildi. Iki ýurduň arasyndaky ylmy-tehniki hyzmatdaşlyk bilen baglanyşykly meselelere bagyşlanan halkara maslahatyna Türkmenistanyň we Täjigistan Respublikasynyň wekilleri gatnaşdy.
Halkara maslahatyň öň ýanynda oňa gatnaşyjylar Türkmenistanyň Ylymlar akademiýasy we Täjigistanyň Milli Ylymlar Akademiýasy tarapyndan neşir edilen kitaplaryň sergisine syn etdiler. Gahryman Arkadagymyzyň ýurdumyzda halk hojalygynyň dürli pudaklarynda gazanylan öňegidişlikler, ýetilen sepgitler barada gürrüň berýän eserleri halkara foruma gatnaşyjylarda uly gyzyklanma döretdi.
