Mälim bolşy ýaly, 2024-nji ýyl TÜRKSOÝ tarapyndan «Türki dünýäniň beýik şahyry we akyldary Magtymguly Pyragy ýyly», Änew şäheri bolsa şol ýylda «Türki dünýäniň medeni paýtagty» diýlip yglan edildi. Bu baradaky çözgüt geçen ýylyň noýabrynda Türkiýäniň Bursa şäherinde geçirilen Türki medeniýetiň halkara guramasynyň (TÜRKSOÝ) hemişelik geňeşiniň 39-njy mejlisinde kabul edildi. Hormatly Prezidentimiziň Kararlaryna laýyklykda, bu wakalar mynasybetli dabaralar we çäreler geçiriler. Şeýlelikde, indiki ýyl Magtymgulynyň doglan gününiň 300 ýyllygy diňe Türkmenistanda däl, eýsem, tutuş türki dünýäde hem giňden bellenilip, halkara ähmiýetli medeni waka öwrüler. Baýramçylyga türki döwletler işjeň gatnaşarlar.
Änew şäheriniň geljek ýylda «Türki dünýäniň medeni paýtagty» hökmünde saýlanyp alynmagy, şeýle hem 2024-nji ýylyň «Türki dünýäniň beýik şahyry we akyldary Magtymguly Pyragy ýyly» diýlip yglan edilmegi aýratyn ähmiýete eýedir. Munuň özi halkara medeni-ynsanperwer gatnaşyklary pugtalandyrmak üçin täze mümkinçilikleri döredýär. Medeni gatnaşyklar halklaryň döredijilik mümkinçiliklerini artdyrmakda, milli medeniýetleriň özara baýlaşmagyny gazanmakda möhümdir. Medeni-ynsanperwer ugur Türkmenistanyň syýasatynda hyzmatdaşlygyň esasy ugurlarynyň biridir. Häzirki wagtda ýurtlaryň arasynda medeni we ylmy taýdan işjeň gatnaşyklar ýola goýulýar, sergiler we çykyşlar, halklaryň sungaty, sazy we filosofik-edebi mirasy bilen tanyşdyrýan halkara maslahatlar guralýar.