Berkarar döwletiň kämil ýaşlary

Bilim
23 Maý 2024
208

Şanly ýylymyzda zehinli ýaşlary ýüze çykarmak maksadyna eýerip, welaýat baş bilim müdirligi bilen bilelikde «Berkarar döwletiň kämil ýaşlary» atly yglan eden döredijilik bäsleşigimiziň jemi jemlenildi. Welaýat medeniýet müdirliginde geçirilen bäsleşigiň jemleýji tapgyryna şäher we etrap möçberinde birinji we ikinji orunlara mynasyp bolan okuwçy gyzlaryň 40-a golaýy gatnaşyp, özleriniň ussatlyklaryny görkezdiler. Bäsdeş gyzlar amaly-haşam sungatyny dowam etdirmek, nakgaşçylyk işlerini ýerine ýetirmek, keşdedir gaýma gaýamak boýunça öz başarnyklaryny subut etdiler. Biri-birinden, owadan we nepis ýerine ýetirilen işlerde, döredilen goşgudyr gazallarda bagtyýar döwrümiziň, şanly ýylymyzyň, nurana günlerimiziň waspy öz beýanyny tapdy. Netijede Türkmenabat şäherindäki 3-nji orta mekdebiň okuwçysy Aýnura Rustamowa birinji, Türkmenabat şäherindäki 25-nji orta mekdepden Aziza Artykowa ikinji we Dänew etrabyndaky 18-nji orta mekdebiň okuwçysy Selbi Babajanowa üçünji orunlara mynasyp boldular. Ýeňijileri welaýat geňeşimiziň adyndan gymmatbahaly sowgatlar we Hormat hatlary bilen sylagladyk.

Durdy MAMEDOW,
Türkmenistanyň Magtymguly adyndaky Ýaşlar guramasynyň welaýat geňeşiniň başlygy.
Beýleki habarlar