Halal kespli daýhanlarymyz şanly ýylyň oba hojalyk möwsümini üstünliklere beslemegi maksat edinip, tutanýerli zähmet çekýärler. Olar gowaça ekişini iň soňky gektarlarda agrotehnikanyň talaplaryna laýyklykda geçirýärler. Şonuň netijesinde ekiş geçirilen meýdanlarda bu tehniki ekiniň ýaşyl hatarlary barha artýar. Şeýle buýsandyryjy görnüş welaýatymyzyň ussat ýer eýeleriniň geljek altyn güýzde Watan harmanyna pagtanyň 320 müň tonnasyny tabşyrmak baradaky meýilnamalaryny üstünlikli berjaý etjekdiklerine bolan ynamy berkidýär.

Üstümizdäki ýylda welaýatymyz boýunça gowaça 130 müň gektar meýdana ekiler. Bu möhüm çäräni ýokary hilli, bellenilen möhletinde geçirmek üçin daýhanlardyr olaryň ýakyn ýardamçylary bolan mehanizatorlar uly tagallalary edýärler. Ekişiň edilýän talaplara laýyklykda geçirilýändigine gowaça ekilen meýdanlaryň 40 müň gektardan gowragynda gowy gögerişiň alnandygy hem aýdyň şaýatlyk edýär. Mehanizatorlar bolsa gowaçalaryň hatar aralaryny bejermek işlerine hem guramaçylykly girişdiler. Bu möhüm çäreler Çärjew, Saýat, Halaç, Kerki etraplarynyň hojalyklarynda has guramaçylykly we netijeli alnyp barylýar.