Üstümizdäki ýylyň zähmet üstünliginden ruhlanan Ak bugdaý etrabynyň gallaçylary häzirki günlerde ak ekini daýhan aladasy bilen gurşaýarlar. Geljek ýylyň hasyly üçin 26 müň gektarda däne ekişini agrotehnikanyň talaplaryna laýyklykda geçirip, kadaly gögeriş gazanan etrabyň janypkeş daýhanlary ekin meýdanlaryna ösüş suwuny tutmak işlerine jogapkärli çemeleşýärler. Ýaşajyk maýsaly meýdanlary mineral dökünler bilen iýmitlendirmek işleri hem utgaşykly alnyp barylýar. Bu işlerde tehnikalaryň hyzmatyndan netijeli peýdalanylýar.

Ýaşajyk maýsalaryň ideginiň agrotehniki möhletlerde berjaý edilmegi olaryň günsaýyn boý almagyna oňyn täsirini ýetirýär. Etrabyň Magtymguly adyndaky daýhan birleşiginiň, M.Sopyýew adyndaky Oba hojalyk paýdarlar jemgyýetiniň, “Üzümli toprak”, “Ak üzüm” daýhan hojalyklarynyň zähmetkeşleri ideg işlerinde nusga bolýarlar.