Mary welaýatynyň ekerançylary şu ýyl bugdaý hasyly ýygnalandan soň, 17 müň 900 gektar meýdana gant şugundyryny ekip, onuň 224 müň tonnasyny öndürmegi meýilleşdirýärler. Turuwbaşdan alada bilen gurşalyp, talaba laýyk idegi ýetirilen bu ekin altyn güýzi berekede besledi. Ekin meýdanlarynda gant şugundyrynyň görseň gözüňi dokundyrýan hasyly kemala geldi. Şu günler bu aralyk ekininiň hasylyny çalt we ýitgisiz ýygnamak bilen baglanyşykly işler günsaýyn güýçlenmek arkaly dowam edýär. Bu işde welaýatyň Baýramaly, Murgap, Wekilbazar etraplarynyň gant şugundyrçylary işjeňlik görkezýärler.