Mary welaýatynyň oba hojalykçylary gant şugundyrynyň hasylynyň ýygymyna girişdiler. «Pähim-paýhas ummany Magtymguly Pyragy» ýylynda Murgap jülgesiniň hasyl ussatlary 17 müň 900 gektara aralyk ekin hasaplanýan gant şugundyryny ekip, bereketli hasyl ýetişdirdiler. Sebitiň hasyl ussatlary şu möwsümde azyndan 224 müň tonna gant şugundyryny ýygnap alyp, döwlete tabşyrmagy maksat edinýärler.

Ýetişdirilen bereketli hasyly zaýasyz, öz wagtynda ýygnap almak üçin welaýatda möwsüme hemmetaraplaýyn taýýarlyk görüldi. Gant şugundyrynyň hasylyny ýygnamakda, daşamakda ulanyljak tehnikalar we oba hojalyk gurallarydyr awtoulaglar, hasyly kabul ediş nokatlary öňünden birkemsiz taýýar edildi. Welaýatyň Garagum, Baýramaly, Türkmengala, Sakarçäge, Murgap we beýleki etraplarynda gant şugundyrynyň bitginli hasylynyň kemala getirilendigini hünärmenler buýsanç bilen gürrüň berýärler.