Hormatly Prezidentimiz Gurbanguly Berdimuhamedowyň parasatly baştutanlygynda amala aşyrylýan düýpli özgertmeleriň netijesinde ýurdumyzyň durmuş-ykdysady ösüşi Berkarar döwletiň bagtyýarlyk döwründe bedew bady bilen öňe barýar. Bu ösüşde uly rowaçlyga beslenýän ýurdumyzda hormatly Prezidentimiziň soňky on dört ýyldan gowrak döwrüň dowamynda amala aşyran tutumly işleri biziň halkymyzy berkarar döwletiň bagtyýarlyk döwrüne eýe etdi. Şol tutumly işleriň barşynda amala aşyrylan özgertmeler ähli ugurlarda uly üstünliklere getirdi. Soňky iki hepdäniň dowamynda hormatly Prezidentimiziň ýurdumyzy durmuş-ykdysady taýdan ösdürmegiň dürli ulgamlarynda «Türkmenistan — Bitaraplygyň mekany» şygary astynda dowam eden 2020-nji ýylda amala aşyrylan işleriň netijelerine bagyşlap geçiren iş maslahatlarynda, hususan-da geçen hepdäniň anna güni, 12-nji fewralda paýtagtymyzdaky Ruhyýet köşgünde geçiren Türkmenistanyň Ministrler Kabinetiniň giňişleýin mejlisinde getirilen anyk maglumatlar biziň bu aýdýanymyzy ýene-de bir gezek bütin aýdyňlygy bilen subut eden wakalar boldy. Çünki bu amal edilen işleriň esasynda hormatly Prezidentimiziň iňňän oýlanyşykly, öňdengörüjilikli, parasatly, ynsanperwer syýasaty ýatyr. Mundan on dört ýyl öň, biziň Garaşsyz, hemişelik Bitarap Türkmenistan döwletimiziň Prezidenti wezipesine saýlananda: «Ilkinji nobatda, meniň ähli aladam halkym bolar» diýen parasatly ýörelgäni baýdak edinip, halka daýanyp, halkyň hatyrasyna düýpli özgertmeleri amala aşyrmaga gönükdirilen bu syýasat hormatly Prezidentimiziň baştutanlygynda halkymyzyň soňky ýyllarda gazanan uly üstünlikleriniň, ýeten belent sepgitleriniň girewi boldy diýsek hakykatdan daş düşmeris.
Munuň özi diňe öz saýlan milli Lideriniň daşyna berk jebisleşip, agzybir hereket edýän halkyň şunuň ýaly bagtyýarlyga eýe bolup bilýändiginiň dünýä jar edilmesidir. Biziň ata-babalarymyz muny müňýyllyklaryň dowamynda durmuş ýörelgesi hökmünde dowam edip gelipdirler. «Agzybire taňry biýr» diýip, türkmen ýönelige aýtmandyr. Biziň beýik akyldar şahyrymyz Magtymguly Pyragy: «Bir suprada taýýar kylynsa aşlar, göteriler ol ykbaly türkmeniň» diýen paýhasy geljekki nesillere wesýet edip gidipdir. Hormatly Prezidentimiz bolsa ata-babalarymyzyň şunuň ýaly dürdäne pähimlerini, akyldar kişilerimiziň parasatly pikirlerini halkyň hatyrasyna amal edýän işleriniň gönezligi hökmünde peýdalanmak bilen, tutumly işleri amala aşyrýar.
