Ak bugdaý etrabyndaky ýöriteleşdirilen 27-nji orta mekdebiň futbol meýdançasynda «Türkmenistan — ruhubelentligiň we sagdynlygyň ýurdy» atly XIV spartakiadanyň çäginde kiçi futbol ýaryşynyň etrap tapgyry geçirildi. Oňa orta mekdepleriň 8-9-njy synp okuwçy oglanlaryndan düzülen toparlar gatnaşdy.
«Türkmenistan» Ýaşlar bedenterbiýe-sport guramasynyň welaýat bölüminiň, etrabyň bedenterbiýe we sport baradaky Baş müdirliginiň hem-de etrap bilim bölüminiň bilelikde guramagynda geçen ýaryşda okuwçy ýaşlar öz aralarynda güýç synanyşdylar. Çekeleşikli geçen ýaryşyň netijesinde etrapdaky 1-nji orta mekdebiň topary birinji, ýöriteleşdirilen 45-nji orta mekdebiň topary ikinji, 27-nji orta mekdebiň topary üçünji orny eýeledi. Birinji orna mynasyp bolan topar ýaryşyň welaýat tapgyryna gatnaşmaga hukuk gazandy.
