Geçen şenbede Köpetdagyň etegindäki Saglyk ýoluna ildeşlerimiziň 6 müňden gowragy ýygnandy. Şol gün Birleşen Milletler Guramasynyň Baş Assambleýasynyň 78-nji sessiýasynda «Birleşen Milletler Guramasynyň oýunlary» atly Kararnamanyň kabul edilmegi mynasybetli köpçülikleýin Saglyk ýolundan geçildi. Bu dabaralara hormatly Prezidentimiziň öňbaşçy bolmagy bolsa olaryň gadyr-gymmatyny has-da artdyrdy.
Jana şypa ýoluň 8 kilometrlik menzillerini geçmek dabaralarynyň çäklerinde «Pähim-paýhas ummany Magtymguly Pyragy» ýylynda halkara ýaryşlarda üstünlikli çykyş edip, dünýäniň dürli döwletlerinden Watanymyza medallar bilen dolanyp gelen türgenlerimiz hem sylaglanyldy. Has uly üstünlikleri gazanan türgenlere bolsa döwlet Baştutanymyzyň gol çeken Buýrugy bilen döwrebap awtoulaglar sowgat berildi.
