Hormatly Prezidentimiz Serdar Berdimuhamedowyň Russiýa Federasiýasynyň Tatarystan Respublikasyna iş sapary, XVI BRICS sammitine hormatly myhman hökmünde gatnaşyp, sammitiň mejlisinde beýan eden teklipleri Türkmenistanyň oňyn Bitaraplyga esaslanýan hoşniýetli daşary syýasy ýörelgeleriniň mynasyp dowam etdirilýändigini ýene bir gezek dabaralandyrýan şanly wakalar boldy. Arkadagly Gahryman Serdarymyzyň bu iş saparynyň many-mazmuny ýurdumyzyň strategik hyzmatdaşlyga, hoşniýetli gatnaşyklara esaslanýan, täze gözýetimleri açýan, aýdyň geljegi kepillendirýän başlangyçlara, birek-birege sarpanyň, ynamly garaýşyň binýadynda gurulýan hoşniýetli ýörelgelere, özara bähbitli ykdysady-söwda baglanyşyklara daýanýan syýasatyny ýene bir gezek dabaralandyrdy. Şeýle gatnaşyklar türkmen halkynyň durmuş pelsepesiniň düýp özenini düzýän dostluk, arkalaşyk, goňşuçylyk, hyzmatdaşlyk däp-dessurlaryna ynamly garaýşyň wagtyň mizanynda pugtalanýandygyny ýene bir gezek tassyklap, ýurdumyzyň döwrüň öňe çykarýan täze şertlerinde, ýagdaýlarynda hut şu gymmatlyklaryndan ugur alýandygyny görkezýär.
Hormatly Prezidentimiziň şu gezekki iş sapary özboluşly ähmiýete eýedir. Halkara bileleşiginiň deňhukukly agzalary hökmünde el-ele, egin-egne berip, uzak geljege gönükdirilen täze hyzmatdaşlyklary nazarlamak bilen, halklaryň, ýurtlaryň abadançylygyna, rowaçlygyna hyzmat etjek netijeli gatnaşyklary ösdürmek maksatlary bu iş saparynyň içinden eriş-argaç bolup geçýär. Gadymy Kazan şäherinde geçirilen nobatdaky BRICS sammiti 30-dan gowrak daşary ýurt döwletleriniň wekiliýet Baştutanlaryny, halkara guramalaryň, şol sanda BMG-niň, ŞHG-niň we GDA-nyň ýolbaşçylaryny, şeýle hem Täze ösüş bankynyň prezidentini bir ýere jemledi.
