Türkmenistanda ilatyň saglygyny goramak baradaky alada döwlet syýasatynyň esasy ugurlarynyň biridir. Hormatly Prezidentimiz: «Halkymyzyň saglygyny goramak, ýurdumyzyň abadançylygyny gazanmak biziň iň uly maksadymyzdyr» diýip belleýär. Munuň özi ýurdumyzda ynsan saglygyna bagtyýar durmuşyň, abadançylygyň hem-de Watanymyzyň gülläp ösüşleriniň kepili hökmünde uly ähmiýet berilýändiginiň aýdyň beýanydyr.
Hormatly Prezidentimiziň taýsyz tagallalary bilen ýurdumyzda döwrebap saglyk merkezleriniň yzygiderli açylyp ulanylmaga berilýändigi hem halkymyzyň buýsanjyny artdyrýar. Arkadagly Gahryman Serdarymyzyň şu ýylyň 4-nji oktýabrynda Ministrler Kabinetiniň nobatdaky mejlisinde Türkmenistanda fiziologiýa ylmyny ösdürmegiň 2024 – 2028-nji ýyllar üçin Milli maksatnamasyny; Türkmenistanda lukmançylyk sagaldyş-dikeldiş çäreleriniň 2024 – 2028-nji ýyllar üçin Milli strategiýasyny; Türkmenistanyň immuno-öňüni alyş boýunça 2024 – 2028-nji ýyllar üçin Milli maksatnamasyny tassyklamak; Ilatyň derman serişdeleri we lukmançylyk maksatlaryna niýetlenen önümler bilen üpjün edilmegini kämilleşdirmek; Halkara sagaldyş-dikeldiş merkezini; Halkara fiziologiýa ylmy-kliniki merkezini döretmek; Balkan, Lebap we Mary welaýatlarynda onkologiýa hassahanalarynyň gurluşygynyň taslamalaryny maliýeleşdirmek hakynda Kararlara gol çekmegi hem ýurdumyzyň saglygy goraýyş ulgamyny hemmetaraplaýyn ösdürmek barada giň gerimli tagallalaryň edilýändiginiň aýdyň subutnamasy boldy.
