Orlan meýdanlaram owadan. Asyl-ha, şahyrlaryň şygyr senasy, hudožnikleriň suratlara siňdirýän reňkiniň özeni bugdaýly meýdanlar dälmidir, eýsem? Hany, bugdaý hakdaky, bugdaýly meýdanlar hakdaky goşgudyr aýdymlary ýatlap, Yzzat Gylyç, Durdy Baýram, Aýhan Hajyýew, Annadurdy Akmämmedow ýaly ussat suratkeşleriň elinden çykan suratlary synlaň, onsoň, «hä» diýäýersiňiz.
Ynha, uly Balkanyň gaýrasyndaky, Garagum sährasynyň ilersindäki bugdaýzarlykda durkam, ýokarky pikirler serimde aýlandy durdy. Pah, aňyrsy salgym atyp gidişine gözýetime sepleşýän, hoşasyny gysymlasaň, tokmakbaş däneleri aýaňy doldurýan meýdanyň giňligi — çygry 25 gektara ýeter-de, oňa bugdaýzarlyk diýmezmiň?!
