Hormatly Prezidentimiz Gurbanguly Berdimuhamedowyň durmuşa geçirýän toplumlaýyn ekologiýa syýasaty ýurdumyzda tebigat bilen sazlaşykly, ýaşaýşyň ekologik taýdan arassa gurşawyny döretmäge gönükdirilendir. Şoňa görä-de, Diýarymyzda suw, ýer we biologik serişdeleri rejeli peýdalanmak, biodürlüligi hem-de tebigaty goramak, çölleşmä, tokaýlaryň ýitmegine garşy göreşmek, ilatyň ekologiýa medeniýetini ýokarlandyrmak boýunça giň gerimli işler ýaýbaňlandyrylýar. Şunda daşky gurşawyň abadançylygyny üpjün etmek bilen baglanyşykly möhüm maksatnamalaryň kabul edilip, olaryň yzygiderli amala aşyrylýandygyny aýratyn bellemek gerek.
«Gök guşak» maksatnamasynda bellenilen çäreler esasynda ýurdumyzyň ähli künjeklerinde ýaşyl zolaklar, seýilgähler we seýilbaglar döredildi. Şäherdir obalaryň ekologik taýdan arassalygyny üpjün etmäge gönükdirilen bu maksatnamanyň ilatyň saglygyny goramaga, köpçülikleýin bedenterbiýäni ösdürmäge hem oňaýly şertleri döredýändigi guwandyryjy ýagdaýdyr. Bu ugurda milli Liderimiziň başlangyjy bilen Türkmenistanyň Milli tokaý maksatnamasynyň kabul edilip, üstünlikli durmuşa geçirilýändigini bellemek gerek. Onuň çäklerinde ilatly ýerleriň daş-töweregine ýaşyl zolaklary aýlamak, oba hojalyk meýdanlarynyň daşynda goraýjy tokaý zolaklaryny döretmek, dag arçalarynyň, çöl sazaklarynyň tokaýlarynyň we kenarýaka jeňňellikleriň gaýtadan dikeldilmegi bilen bagly degişli işler geçirilýär. Garaşsyzlyk ýyllarynda Türkmenistanda ekologiýa babatdaky halkara kadalaryň we bu ugurda kabul edilen konwensiýalaryň talaplary milli kanunçylyga berk ornaşdyryldy. Ýurdumyzyň kanunçylygynda, hususan-da, daşky tebigy gurşawy abat saklamak we gowulandyrmak, raýatlaryň oňaýly daşky gurşawa bolan kanuny bähbitlerini durmuşa geçirmek, suw serişdelerine zerurlyklary kanagatlandyrmak bilen bir hatarda, suwy hapalanmakdan hem-de egsilmekden goramak, tokaýlary abat saklamak we üznüksiz giňeldip durmak bilen baglanyşykly gatnaşyklary düzgünleşdirmegiň esaslary beýan edilýär.
