Durmuş aýdyma öwrülende
Aýdym-saz hakda gürrüň gozgalanda, bir täsin rowaýat ýadyma düşýär. «Aýdym bir guşdur, saz onuň ganatydyr». Bagda saýraýan guşlaryň jürküldisi, äpet gomlardan gaýdýan tolkunlaryň şaggyldysy Zeminde heniz adamzat döremänkä hem barmyş. Ynsan bu jahana inip, ol gözelliklere aşyk bolupdyr. Onsoň, ol bu owazlardan mukam, aýdym döretmegiň ugruna çykypdyr. Ol agajyň bir bölegini alyp, kalplara täsir edýän näzikden hoş, daglardan syzylyp çykýan çeşme-çaýlardan dury owaz döredipdir. Ol tokga demri eredip, ondan hyjuwly we gazaply owaz almagy başarypdyr. Şonda türkmen sähralarynda şemala ikiýana yranyp oturan gamyşlar üýtgeşik heňe, owadan owaza öwrülipdir. Hawa, şondan bäri bu gadymy türkmen topragynyň üstünden Amangeldi Gönübek, Garadäli gökleň, Kel bagşy, Mylly Täçmyradow, Magtymguly Garlyýew, Nobat bagşy, Sahy Jepbarow, Orazgeldi Ylýasow, Öwezgeldi Tekäýew, Annaberdi Atdanow, Atabaý Çarygulyýew ýaly, ençeme meşhur bagşylar öz ýoluny, yzyny goýup, halk aýdymlaryny ussatlyk bilen ýerine ýetirip, halkyň hakydasynda öçmejek yz goýdular.
