Maglumat tehnologiýalary boýunça işlenip düzülýän dürli görnüşli sanly taslamalar ulanyjylara giň mümkinçilikleri döredip, olaryň durmuşyny ýeňilleşdirýär. Bu ugurda türkmen hünärmenleri tarapyndan taýýarlanylýan programma üpjünçilikleridir mobil goşundylar, web saýtlar hem uly gyzyklanma döredýär. «Belli Asman» hojalyk jemgyýetiniň täze işläp düzen «Alaja» atly ykjam goşundysy hem köpugurlylygy bilen ünsüňi çekýär.
Täze programma üpjünçiligi ýakynda geçirilen «Türkmentel — 2024» atly XVII halkara forumyň çäklerinde tanyşdyryldy. Ol özboluşly aýratynlyklary bilen tapawutlanýar. Bu sosial platformada köpugurly mümkinçilikler jemlenen. Programmanyň sadadan düşnükli edilip düzülen sahypalarynda hat, surat, audio we wideofaýllary alyşmak hem-de paýlaşmak, elektron usulda söwda etmek, bildirişleri goýmak, täzelikleri yzarlamak, jemgyýetçilik hyzmatlarynyň töleglerini tölemek ýaly hyzmatlar ýerleşdirilipdir. Bu bolsa ykjam enjam ulanylanda her günde ýüze çykýan köp sanly zerurlyklaryň çözgüdini bir goşundynyň kömegi bilen tapyp boljakdygyny görkezýär.
