Magtymguly Pyragynyň doglan gününiň 300 ýyllygyna
Dünýä edebiýatynyň genji-hazynasyna ägirt uly goşant goşan türkmen halkynyň beýik ogly Magtymguly Pyraga bu gün uly sarpa goýulýar. Köpetdagyň eteginde Magtymguly Pyragynyň ajaýyp heýkeliniň we şahyryň adyny göterýän medeni-seýilgäh toplumynyň dabaraly açylmagy, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty tarapyndan taýýarlanylan «Magtymguly» atly kitabyň çapdan çykmagy Gahryman Arkadagymyzyň, Arkadagly Gahryman Serdarymyzyň taýsyz tagallalary bilen akyldar şahyryň doglan gününiň 300 ýyllygynyň halkara derejede toý-dabaralara beslenýän günlerinde her birimiz üçin ajaýyp sowgat bolup, göwünlerimizi galkyndyrdy. Türkmen, rus we iňlis dillerinde aýratyn kitaplar görnüşinde neşir edilen täze kitabyň ilkinji sanynyň Gahryman Arkadagymyza iberilmegi bolsa örän buýsandyryjydyr.
