Mähriban zenanlarymyzyň döreden el işlerinde tebigat bilen durmuşyň sazlaşygy duýulýar. Eşretli zamanamyzyň hözirini görüp, joşgunly zähmet çekýän zenanlarymyz Garaşsyz, baky Bitarap Watanymyzyň gazanýan beýik ösüşleriniň, ýetýän belent sepgitleriniň waspyny yhlas-başarnyklaryny, zehinlerini, söýgülerini siňdirip dokaýan halylarynda, ajaýyp keçelerinde beýan edýärler. Döwrümiziň ösüşlerinden ruhlanyp, berkararlygyň, bagtyýarlygyň ebedi ýoluny gaýtalanmajak nusgalaryna siňdirýärler.
Türkmen zenanlary elmydama gözelligiň gözleginde. Berkarar döwletiň täze eýýamynyň Galkynyşy döwründe gelin-gyzlarymyzyň el hünärleriniň sarpasy belent tutulýar. Eneden gyza, halypadan şägirde miras galýan sungatymyzyň, el işleriniň gymmaty egsilmezdir.