Akyldar şahyrymyz Magtymguly Pyragynyň döredijiligi nusgawy edebiýatymyzyň gymmatly mirasy bolup, nesillerden-nesillere geçip gelýär. Garaşsyzlyk ýyllarynda milli mirasymyzy öwrenmek, olary dünýä halklarynyň arasynda tanatmak babatda uly işler durmuşa geçirildi. Arkadag Serdarly bagtyýar ýaşlar ýylynda hormatly Prezidentimiziň baştutanlygynda durmuşa geçirilýän medeni diplomatiýanyň üstünliklere beslenýändigi, görnükli nusgawy şahyrymyz Magtymguly Pyragynyň döredijiligini öwrenmek, wagyz etmek, aýap saklamak boýunça alnyp barylýan işleriň üstünliklere beslenýändigi örän guwandyryjy ýagdaýdyr. Ine, 10 — 24-nji maý aralygynda Pariž şäherinde geçirilen ÝUNESKO-nyň Ýerine ýetiriji geňeşiniň 216-njy mejlisinde Magtymguly Pyragynyň golýazmalar toplumyny bu guramanyň «Dünýäniň hakydasy» maksatnamasynyň halkara sanawyna girizmek hakyndaky çözgüdiň biragyzdan kabul edilendigi baradaky habar halkymyzy begendirdi.
Görnükli türkmen şahyry we akyldary Magtymguly Pyragynyň golýazmalar toplumynyň «Dünýäniň hakydasy» maksatnamasynyň halkara sanawyna girizilmegi we Magtymguly Pyragynyň 300 ýyllyk ýubileýiniň ÝUNESKO-nyň şanly seneleriniň sanawynda orun almagy beýik söz ussadynyň gymmatly mirasynyň has-da giňden öwrenilmegine, şahyryň döredijiliginiň üsti bilen, türkmen halkynyň milli, edebi gymmatlyklarynyň has çuňňur tanalmagyna ýardam berer. TÜRKSOÝ guramasynyň medeniýet ministrleriniň hemişelik geňeşiniň 39-njy mejlisinde 2024-nji ýyly «Türki dünýäsiniň beýik şahyry we akyldary Magtymguly Pyragynyň ýyly» diýip yglan etmek hakyndaky çözgüdiň kabul edilmegi beýik söz ussadynyň döredijiligine uly hormatyň we gyzyklanmanyň nyşanydyr. Bu üstünlikler hormatly Prezidentimiz Serdar Berdimuhamedowyň türkmen halkynyň edebi mirasynyň giňden ýaýbaňlandyrylmagynyň, medeni we ylmy diplomatiýasynyň üstünliklere beslenýändiginiň nobatdaky subutnamasydyr.
