«Pähim-paýhas ummany Magtymguly Pyragy» ýylynyň bugdaý oragy möwsümine ykjam taýýarlyk görmekde oňa gatnaşjak kombaýnçylaryň, ulag sürüjileriň, jogapkär hünärmenleriň arasynda ýangyn-tehniki howpsuzlygynyň, ýol hereketiniň düzgünleriniň pugta berjaý edilmegi boýunça düşündiriş, wagyz-nesihat çäreleri geçirilýär. Golaýda şeýle mazmundaky okuw maslahaty «Daşoguzobahyzmat» önümçilik birleşigi, welaýat Polisiýa müdirliginiň ýangyn howpsuzlygy, polisiýanyň ýol gözegçiligi bölümleri tarapyndan Şabat etrabynyň «Obahyzmat» önümçilik kärhanasynda guraldy.

Okuw maslahatynda «Daşoguzobahyzmat» önümçilik birleşiginiň zähmeti goramak we tehniki howpsuzlyk boýunça hünärmeni Gurban Öräýew, welaýat Polisiýa müdirliginiň ýangyn howpsuzlygy bölüminiň uly gözegçisi, içerki gullugyň kapitany Serdar Arazberdiýew, şu müdirligiň polisiýanyň ýol gözegçiligi bölüminiň gözegçisi, polisiýanyň kapitany Atageldi Saparmedow, TGÝMJ-niň welaýat bölüminiň adatdan daşary ýagdaýlar baradaky bölümçesiniň müdiri Orazmyrat Orazmedow dagy çykyş etdiler. Aýdylanlardan görnüşi ýaly, welaýatymyzda ýakyn wagtda badalga beriljek bugdaý oragy möwsümine bellenen ugurlar boýunça derwaýys taýýarlyk işleri geçirildi. Bu jogapkärli möwsümiň dowamynda ýangyn-tehniki howpsuzlygynyň, ýol hereketiniň talaplary doly we dogry ýerine ýetirilmelidir. Munuň özi hasylyň ýitgisiz ýygnalmagyna, dürli garaşylmadyk hadysalaryň öňüniň alynmagyna mümkinçilik berer. Okuw maslahatynda gyzyklandyrýan meseleler boýunça soraglara jogaplar berildi.