Hormatly Prezidentimiziň 10-njy maýda Ministrler Kabinetiniň sanly ulgam arkaly geçirilen nobatdaky mejlisinde «Türkmenistanda biotehnologiýany toplumlaýyn ösdürmegiň 2024 – 2028-nji ýyllar üçin Döwlet maksatnamasyny tassyklamak hakynda» Karara gol çekmegi biotehnologiýanyň kömegi bilen ýurdumyzda ösen biosenagaty emele getirmegiň ylmy esaslaryny işläp düzmekde möhüm ädime öwrüldi. Täze Maksatnama we ony amala aşyrmak boýunça ýerine ýetirilmeli çäreleriň Meýilnamasy degişli ministrlikler hem-de pudaklaýyn dolandyryş edaralary bilen bilelikde Türkmenistanyň Ylymlar akademiýasynyň Tehnologiýalar merkezi tarapyndan işlenip taýýarlanyldy. Täze kabul edilen maksatnama bilen bilelikde, biotehnologiýanyň kömegi bilen ýurdumyzda ösen biosenagaty emele getirmek göz öňünde tutulýar.
Ylmyň we bilimiň çalt depginlerde ösmegi bilen dünýäde «ýaşyl» ykdysadyýetiň möhüm ugurlary: eko-, nano-, bio- we maglumat tehnologiýalary giň gerime eýe bolýar. Biotehnologiýa, käbir tehnologiki meseleleri çözmek üçin janly organizmleri ýa-da metabolik önümlerini ulanmak mümkinçiligini öwrenýän ylymdyr. Biotehnologiýanyň kömegi bilen adamyň käbir zerurlyklary kanagatlandyrylýar, mysal üçin: derman serişdeleri işlenip düzülýär, ösümlikleriň we haýwanlaryň täze görnüşleri döredilýär, azyk önümleriniň hili ýokarlandyrylýar.