Ýurdumyzda «Pähim-paýhas ummany Magtymguly Pyragy» ýylynda Gündogaryň akyldar şahyry Magtymguly Pyragynyň doglan gününiň 300 ýyllygy bellenilýär. Bu şanly senäniň diňe bir ýurdumyzda däl, eýsem, halkara derejesinde giňden bellenilýändigini aýratyn bellemek gerek. Munuň özi akyldar şahyryň pähim-paýhasa ýugrulan goşgularynyň dünýä edebiýatynyň aýrylmaz bir bölegidigini, dünýä halklarynyň akyldaryň döredijiligine uly hormat goýýandygyny alamatlandyrýar.
Mälim bolşy ýaly, Magtymguly Pyragynyň golýazmalar toplumy BMG-niň Bilim, ylym we medeniýet meseleleri boýunça guramasynyň (ÝUNESKO) «Dünýäniň hakydasy» maksatnamasynyň halkara sanawyna girizildi. Mundan başga-da, şahyryň doglan gününiň 300 ýyllygy 2024-2025-nji ýyllarda ÝUNESKO bilen bilelikde bellenilip geçiljek şanly seneleriň sanawyna goşuldy. Türki medeniýetiň halkara guramasy (TÜRKSOÝ) tarapyndan 2024-nji ýyl «Türki dünýäsiniň beýik şahyry we akyldary Magtymguly Pyragy ýyly» diýlip yglan edildi.