Huaçžunyň Ylym we tehnologiýa uniwersitetiniň (Hytaý) alymlary daşky gurşaw bilen adamyň ruhy ýagdaýynyň arasynda gös-göni baglanyşygyň bardygyny ýüze çykardylar. Barlaglar ýaşyl zolaklarda ýaşamagyň ruhy çökgünligi we aladalaryň derejesini köp babatda peseldýändigini görkezdi.
Alymlar ylmy-barlag merkezinde saklanýan 409 müň 556 adamyň maglumatlaryny seljerdiler. Olar barlaga gatnaşyjylaryň öýleriniň ýaşyl zolaklara golaýlygy, özlerini duýuşlary we beýleki ýagdaýlary baradaky maglumatlary içgin öwrenip, baha berdiler. Alymlar ozaly bilen, barlaga gatnaşýanlaryň her biriniň öýüniň töweregindäki ýaşyl zolaklaryň ýaýrawyna üns gönükdirdiler. Soňra alymlar ýaşyl zolakda ýaşaýanlaryň soňky 12 ýyldaky ruhy taýdan bozulmalarynyň döremek howpuna baha berdiler. Netijeler, ýaşyl giňişliklerde uzak wagtlap ýaşamagyň ruhy çökgünligi we aladalary azaldýandygyny ýüze çykardy.