Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzda toýlar toýa ulaşýar. Ata Watanymyzda uly ruhubelentlik bilen bellenip geçilen Türkmen bedewiniň milli baýramy halkymyzyň behişdi bedewlere goýýan belent hormat-sarpasynyň aýdyň ýüze çykmasyna öwrüldi.
Arkadag şäherindäki Aba Annaýew adyndaky Halkara atçylyk akademiýasynda geçirilen baýramçylyk çäresinde hormatly Prezidentimiziň täze doglan taýçanaga Ylham diýip at goýmagy hem-de onuň boýnuna mähriban käbesi Ogulgerek ejäniň ören alajasyny dakmagy täsirli pursatlara beslendi. «Pähim-paýhas ummany Magtymguly Pyragy» ýylymyz bilen baglylykda dakylan bu at galkynan göwünleriň buýsanjyny has-da artdyrdy. Ýylymyz bilen çuňňur many-mazmuna eýe bolan täze taýçanak türkmen topragyna Ylham bolup geldi. Arkadagly Gahryman Serdarymyzyň baştutanlygynda bedew batly menziller ylham-joşguna, beýik ýeňişlere beslenýär. Ýeri gelende bellesek, Gahryman Arkadagymyz ýakynda täze doglan taýçanaga Şahyr diýip at goýdy we onuň boýnuna alaja dakdy.