Türkmenistanyň Içeri işler ministrliginiň Polisiýanyň ýol gözegçiligi gullugy köçe-ýol hereketini takyk, howpsuz guramak bilen bagly işleri talabalaýyk ýerine ýetirmek üçin ýol belgilerini, ugur görkezijilerini we ýol-inženerçilik enjamlaryny degişli ýerlerde ýerleşdirmek boýunça giň gerimli işleri amala aşyrýar. Gerekli ýerlerinde dogry ýerleşdirilen ýol belgileridir ugur görkezijiler sürüjiniň dolandyryp barýan ulagyny bellenilen tizliklere görä, kadaly ýagdaýda dolandyrmagyna mümkinçilik berýär.
Hormatly Prezidentimiziň taýsyz tagallalary bilen häzirki wagtda ýol-ulag ulgamynda dünýäniň öňdebaryjy ýol-inženerçilik talaplaryna laýyk gelýän ýörite ýagtylandyrylýan hem-de ýagtylygy yzyna serpikdirýän dürli görnüşdäki ýol belgileri ulanylýar. Oklaw ýaly göni we aýna ýaly tekiz ýollaryň gatnaw böleklerinde ýol çyzgytlaryň dogry çyzylmagy bolsa, diňe bir sürüjini habardar etmek bilen çäklenmän, eýsem, ýol hereketine gatnaşýan pyýadanyň hem howpsuzlygyny ýokarlandyrýar.