Beýik Ýüpek ýolunyň merkezinde ýerleşen Türkmenistan döwletimizde güneşiň çogundan mähirlenip ýaşaýan halkymyz toýlaryny uludan tutup, bagşy-sazandalaryň şirin owazlaryny kalbynda hemişelik ýaşadýan halk. Türkmeniň haýsy birini alsaň-da medeni mirasymyzyň, halk senedimiziň inçe syrlaryndan baş çykaryp bilýändir. Sebäbi ene-mamalarymyzyň çaganyň dünýä inen ilkinji günlerinden başlap, onuň beýnisine ýakymly hüwdüsini guýmagy ynsanyň aýdym-saza bolan ukybyny ýüze çykarypdyr. Türkmen zenanlary hüwdüler arkaly çagalary ukladypdyrlar, bardy-geldi çaga nähoşlan mahalynda-da, hüwdi bilen ony rahatlandyrypdyrlar.
Töründe dutar-gyjak ýaňlanan öý bagtly öý hasaplanypdyr. Türkmende eline saz guralyny alyp görmedik ýigit bolmandyr, kynçylykly pursatlarda hem dutar olaryň ýoldaşy bolupdyr. Ýazyjy Nurmyrat Saryhanowyň «Şükür bagşy» eseri muňa aýdyň mysaldyr.