Ak bugdaý etrabynyň Gämi oba Medeniýet öýünde N.Saryýew adyndaky çagalar sungat mekdebiniň hasabat konserti geçirildi. Oňa mekdebiň mugallymlarydyr okuwçylary, ýaş zehinleriň ene-atalary, dogan-garyndaşlary, sungatyň muşdaklary hem-de beýleki myhmanlar gatnaşdy.
Däbe öwrülen hasabat konserti okuw ýylynyň netijeliligine we sungat älemine gadam basan ýaş zehinleriň ukyp-başarnygyna göz ýetirmäge özboluşly mümkinçilikdir. Her ýylda geçirilýän bu çäreler milli aýdym-saz sungatymyzy ösdürjek nesliň kemala gelýändigini äşgär edýär. Şanly toýa barýan şu şatlykly günlerde medeni ojagyň toý ruhundaky sahnasynda ýaňlanan belent owazly şirin mukamlary diňlemek has-da lezzetli boldy.
