Türkmen alymlarynyň biri Ibrahim as-Sulydan «Ynsanyň ýagşy gylyklydygyny neneňsi bilip bolýar?» diýip sorapdyr. Alym: «Bir adamyň wepalylygyny, sözünde tapylýandygyny, ýagşy gylyk-häsiýetlidigini, aslynyň arassa, zandynyň päkdigini bilmek isleseň, onuň Watanyny küýseýşine, Watana bolan söýgüsine seret. Eger ol adam dogan-garyndaşlaryny göresi gelýän bolsa, ata-babalarynyň geçmişine buýsanýan bolsa, onda bilgin, ol adam hakyky wepaly, arassa ahlakly adamdyr» diýip jogap beripdir. Hakykatdan-da, Watanyna wepaly, birsözli, mert, batyr, dogruçyl häsiýetli ynsanlar jemgyýetiň içinde-de, döwletiň öňünde-de ynamdardyr. Sebäbi ady agzalan häsiýetleri özünde jemleýän adama Watanyň goragy ynanylýar.
Ynha, podpolkownik Baýramgeldi Hümmedowyň serkerdelik edýän serhet birikmesinde çagyryş boýunça harby gullugyny geçýän esgerler Aýdogdy Ataýew, Döwlet Aýdogdyýew, 3-nji derejeli kapitan Tirkiş Mämmedowyň serkerdelik edýän serhet birikmesinde çagyryş boýunça harby gullugyny geçýän Begenç Hudaýberdiýew, şeýle-de maýor Mämedin Garakişiýewiň serkerdelik edýän serhet birikmesinde çagyryş boýunça harby gullugyny geçýän Daýanç Allanazarow dagy ata Watanymyzyň öňünde eden harby kasamyna ygrarly bolup, ýurdumyzyň dost-doganlyk serhetlerini goramakda özleriniň mynasyp goşantlaryny goşmagy başardylar. Olar görkezen edermenlikleri üçin Serhet gullugymyz tarapyndan Hormat hatlary we gymmatbahaly sowgatlar bilen sylaglandylar.
