Berkarar döwletimiziň bagtyýarlyk döwründe durnukly ösüşi nazarlaýan eziz Diýarymyzda hormatly Prezidentimiziň taýsyz tagallalary, beýik başlangyçlary netijesinde ak şäherimiz Aşgabat gün-günden gözel keşbe eýe bolýar. Ildeşlerimiziň göz-guwanjy, jahankeşdeleriň görmegi arzuw edýän merjen paýtagtymyz gözelligiň, arassalygyň, binagärlik sungatynyň ajaýyp nusgasyna öwrülýär. Aşgabat gaýtalanmajak binagärlik keşbi bilen çägini giňeldip, bagy-bossanlyga öwrülip, gözelleşip, ajaýyp keşbi bilen görenleri haýran galdyrýar. Şeýle gözellikleri görüp, şeýle ajaýyplyklara şaýat bolanyňda eziz paýtagtymyza «Gündogaryň merjen şäheri» diýilmeginiň many-mazmunyna göz ýetirýärsiň. Her säher gülüp dogan nurana Gün Aşgabadyň ajaýyp binalaryna nur çaýyp, täze bir öwüşgin bilen ýalkym saçýar, täze bir bagtyýar günüň başlanandygyndan habar berýär. Paýtagtymyzy etekläp oturan gojaman Köpetdagyň gerişlerinde gurlan «Saglyk ýolunyň» belent nokatlaryna çykyp, Gün nuruna şöhle saçyp, päkligi ýatladyp duran ak mermer şäheri synlanyňda paýtagtymyza buýsanjyň, guwanjyň joşýar. Şol pursat şeýle ajaýyplyklaryň başynda duran, halkymyza bagtyýarlygy peşgeş eden Gahryman Arkadagymyza bolan buýsanç bütin kalbyňa dolýar.
Dünýä parahatçylyk, ynanyşmak nuruny çaýýan Aşgabadyň häzirki zamanyň iň gözel, ajaýyp şäheridigine biziň her birimiz aýdyň göz ýetirýäris. Iş wagty tamamlanyp, öýüňe dolanan wagtyňda agşamlary asuda şäherimiziň tämiz ýollarynyň ugrundaky täsin suw çüwdürimleriniň ýakymly sesi göwünleri galkyndyrsa, bulduraşýan suw damjalary kalbyňa rahatlyk çaýýar. Şol pursat uzak günki ýadawlygyňam el bilen aýrylan ýaly bolýar.
