Beýik Garaşsyzlygymyzyň 30 ýyllyk toýunyň uludan toýlanyljak «Türkmenistan — parahatçylygyň we ynanyşmagyň Watany» ýylymyzyň ilkinji günleri täze taryhymyza altyn harplar bilen ýazylan şanly wakalara beslendi. Olardan Akina — Andhoý menzilleriniň arasyndaky 30 kilometrlik demir ýoluň ulanmaga berilmegi, Kerki — Şibirgan ugry boýunça kuwwatlygy 500 kilowolt bolan 153 kilometrlik elektrik geçiriji ulgamynyň, Ymamnazar — Akina, Serhetabat — Turgundy optiki-süýümli halkara ulgamynyň işe girizilmegi, şeýle-de, Çärjew etrabynyň «Malaý» gaz känindäki täze gaz gysyjy desganyň açylyş dabarasy häzirki we geljekki nesilleriň mynasyp durmuş derejesiniň üpjün edilmegine, dost-doganlyk taglymatynyň ornaşdyrylmagyna, Ýer ýüzünde hoşniýetli gatnaşyklaryň, ösüşiň kemala gelmegine itergi berýär.
14-nji ýanwarda hormatly Prezidentimiziň Lebap welaýatynyň «Ruhyýet» köşgünde — Türkmenistanda we Owganystanda dabara gatnaşyjylary birleşdiren teleköpriniň geçirilen ýerinde eden taryhy çykyşynda belleýşi ýaly, bu iri taslamalar umumy maksada, biziň ýurtlarymyzyň uzakmöhletleýin ösüşine kuwwatly itergi bermäge, türkmen-owgan halklarynyň gülläp ösmegine we abadançylygyna gönükdirilendir. Milli Liderimiz möhüm ähmiýetli taslamalaryň durmuşa geçirilmeginde, Owganystan Yslam Respublikasy bilen netijeli, deňhukukly, hakyky doganlyk gatnaşyklaryna biziň ýurdumyzda ýokary baha berilýändigini aýratyn nygtady.
