Milli Bahar baýramyna bagyşlanyp, Bäherden etrabynyň sport mekdebinde sportuň küşt we stoluň üstünde oýnalýan tennis görnüşleri boýunça türgen gyzlaryň arasynda ýaryş geçirildi. Etrabyň bedenterbiýe we sport bölüminiň hem-de Türkmenistanyň Magtymguly adyndaky Ýaşlar guramasynyň etrap Geňeşiniň bilelikde guramagynda geçen ýaryşa ýaş türgenleriň uly topary gatnaşdy.
Gyzykly geçen ýaryşyň netijesinde küşt boýunça 30-njy orta mekdebiň okuwçysy Leýli Geldiýewa birinji, 27-nji orta mekdebiň okuwçysy Gülnäz Adylowa ikinji, şol mekdebiň okuwçysy Mylaýym Toýlyýewa üçünji orunlary eýelediler. Stoluň üstünde oýnalýan tennis görnüşinde birinji, ikinji orunlara degişlilikde 27-nji orta mekdebiň okuwçylary doganlar Şirinaý, Ogulşeker Ýaranowalar, üçünji orna 28-nji orta mekdebiň okuwçysy Mährigül Garamämmedowa mynasyp boldy. Ýeňijilere guramaçylar tarapyndan hormat hatlarydyr ýadygärlik sowgatlar gowşuryldy.
