Ak bugdaý etrabynyň sport mekdebinde «Türkmenistan — ruhubelentligiň we sagdynlygyň ýurdy» atly XIII spartakiadanyň çäginde okuwçy gyzlaryň arasyndaky woleýbol ýaryşynyň final oýunlary geçirildi. Halkara zenanlar gününiň öňüsyrasyndaky ýaryşy “Türkmenistan” Ýaşlar bedenterbiýe-sport guramasynyň welaýat bölümi, welaýatyň bedenterbiýe we sport baradaky Baş müdirligi, welaýat Baş bilim müdirligi hem-de jemgyýetçilik guramalary bilelikde gurady.
Welaýatymyzyň gündogar we günbatar sebit etraplarynda geçirilen ýaryşlarda tapawutlanan toparlar aýgytlaýjy duşuşyklarda ukyp-başarnygyny görkezdiler. Mekdebiň ýokary derejede enjamlaşdyrylan woleýbol zaly ýaryşyň guramaçylykly geçmegine şert döretdi. Çekeleşikli duşuşyklar güýçli toparlary ýüze çykardy. Netijede, Tejen etrabynyň okuwçy gyzlardan düzülen topary ýaryşyň ýeňijisi boldy. Onda Ak bugdaý etrabynyň topary ikinji, Kaka etrabynyň topary üçünji orny eýeledi. Ýeňiji toparlara hormat hatlary we ýadygärlik sowgatlar dabaraly ýagdaýda gowşuryldy.
