Angliýanyň FA Kubogynyň çäginde 1/8 finalda «Mançester Siti» topary myhmançylykda «Luton Tawn» bilen duşuşdy. Myhmanlaryň doly artykmaçlygynda geçen oýunda «Mançester Siti» 6–2 hasabynda ýeňiş gazandy. «Mançester Sitiniň» gollarynyň 5-sini Erling Holann geçirdi. Ol 3-nji, 18-nji, 40-njy, 55-nji hem-de 58-nji minutlarda tapawutlandy. «Mançester Sitiniň» beýleki goluny-da 72-nji minutda Mateo Kowaçiç öz adyna ýazdyrdy. «Luton Tawnyň» gollarynyň 2-sini hem Jordan Klark (45, 52) derwezä girizdi. Duşuşykda Holannyň geçiren 1-nji 4 golunyň asistlerini Kewin De Bruýne berdi. Erling Holann «Mançester Sitide» 8-nji gezek het-trik edip, ol 1970-nji ýylda Jorj Bestden soň FA Kubogy duşuşygynda 5 gol geçiren ilkinji oýunçy boldy. Holann şu möwsümde 29 duşuşykda 27 gol geçirip, 6 goluň pasyny berdi.
Şeýle-de, FA Kubogynda «Liwerpul» «Southemptony» Kumas we Dannsyň (2) gollary bilen 3–0 ýeňdi. «Mançester Ýunaýtede» myhmançylykda «Nottingam Foresti» ýeňmegi üçin Kazemironyň ýeke-täk goly ýeterlik boldy. «Çelsi» öz meýdançasynda Gallageriň 90-njy minutdaky goly bilen «Lidsi» 3–2 hasabynda utup, ýeňşini baýram etdi. Şeýle-de, 1/8 finalda şu netijeler hasaba alyndy: «Kowentri Siti»—«Meýdstoun Ýunaýted»: 5–0, «Bornmut»—«Lester»: 0–1 (g.w.), «Bläkbörn»—«Nýukasl»: 1–1 (3–4 p), «Wulwerhempton»–«Braýton»: 1–0. 16-njy martda geçiriljek çärýek finalda «Mançester Siti» «Nýukasly», «Wulwerhempton» «Kowentrini», «Çelsi» «Lesteri», «Mançester Ýunaýted» «Liwerpuly» kabul eder.
