Türkmenistanyň Kärdeşler arkalaşyklarynyň welaýat birleşmesiniň guramagynda Türkmenabat köpugurly sport toplumynda welaýat merkezindäki ýörite we orta hünär okuw mekdepleriniň talyp gyzlarynyň arasynda «Bagtyýarlygyň we sagdynlygyň ýurdy, jan Watanym, Türkmenistan» atly ýaryş geçirildi. Türgen gyzlar sportuň düzzüm, şaşka we küşt görnüşleri boýunça bäsleşdiler.
Gyzykly we çekeleşikli ýagdaýda geçen bäsleşikde düzzüm boýunça birinji orny Türkmenabat şäherindäki derýaçylyk orta hünär okuw mekdebiniň talyby Gunça Toraýewa eýeledi. Ikinji we üçünji orunlara degişlilikde Türkmenabat şäher häkimliginiň Türkmenistanyň Gahrymany Gurbansoltan eje adyndaky 1-nji hünär-tehniki okuw mekdebiniň talyby Dildara Hojaýewa we Türkmenabat şäher häkimliginiň 2-nji hünär-tehniki okuw mekdebiniň talyby Lalahan Ýazmuradowa mynasyp boldular.
