Angliýanyň çempionatynda çekeleşikli hem-de dartgynly geçen London derbisinde «Tottenham» öz meýdançasynda «Çelsiden» 4–1 hasabynda asgyn gelip, möwsümde ilkinji gezek ýeňlişe sezewar boldy. Duşuşygyň 6-njy minutynda «Tottenham» Kulusewskiniň goly bilen 1–0 hasabynda öňe geçdi. Ýöne şondan soň demirgazyk londonlylar üçin şowsuzlyklaryň yzy üzülmän geldi. Oýnuň 35-nji minutynda «Çelsiden» Kaisedonyň batly uran urgusy ofsaýd sebäpli hasaba alynmady. Emma VAR-yň seljeren şol pursadyndan «Tottenhamyň» argentinaly goragçysy Kristian Romera gyzyl kart çykdy hem-de «Çelsiniň» peýdasyna 11 metrlik jerime urgusy bellendi. Ony-da Koul Palmer dürs urup, hasaby deňledi. Bu goldan öňem Sterlingiň golunyň el bilen oýnalany üçin hasaba alynmandygyny hem bellemek gerek. Duşuşygyň 1-nji ýarymy 1–1 hasabynda deňlikde tamamlandy. 55-nji minutda «Tottenham» toparynyň ýene bir oýunçysy, has takygy, goragçy Destini Udoji 2-nji sary karty alyp, meýdançadan çykaryldy. 9 oýunçy bolup galan garşydaşyna garanyňda has dogumlanan «Çelsi» toparynyň ýaş hüjümçisi Nikolas Jekson soňky 15 minutda 3 gol geçirdi. Ol 75-nji, 90+4-nji hem-de 90+8-nji minutlarda tapawutlanyp, duşuşygy het-trik bilen tamamlady. Şunlukda, Maurisio Poçettino ozalky kluby «Tottenhamyň» ýeňilmezlikligine soňky nokady goýdy hem-de topar 2-nji orna düşdi.
Angliýada Londonyň başga bir klubunyň — «Arsenalyň» hem ýeňilmezekligi soňlanyp, «Nýukasl» güýçli garşydaşyny jedelli pursatda Gordonyň ýeke-täk goly esasynda 1–0 hasabynda ýeňdi. «Mançester Siti» öz meýdançasynda «Bornmuty» 6–1 hasabynda ýeňdi. Duşuşykda Bernardo Silwa 2 gezek tapawutlandy. «Şeffild Ýunaýtediň» möwsümdäki ilkinji ýeňşini gazanan tapgyrynda myhmançylykda «Luton» bilen duşuşan «Liwerpul» soňky minutlarda ýeňlişden halas boldy.