Berkarar döwletiň täze eýýamynyň Galkynyşy döwründe milli aýdym-saz sungatymyz Ýer ýüzüne ýaň salýar. Bu sungat halkymyzyň köňül buýsanjyna öwrüldi, çünki ol ynsan kalbyna ruhy taýdan medet beriji güýçdür. Ajaýyp döwrümiziň ruhy galkynyşy, şan-şöhratly döwletimiziň bedew batly ösüşleri we özgerişlikleri milli aýdym-sazlarymyzda belent heňlerde wasp edilýär.
Diýarymyzyň günortasyndaky Pendi ýaýlasynda il içinde adygan «Bagtyýar käbeler» estrada topary 2015-nji ýylda Türkmenistanyň at gazanan medeniýet işgäri Gurbangül Babaýewanyň tagallasy bilen döredildi. Bu topar ilhalar halk, estrada aýdymlary bilen diňleýjileriň söýgüsini gazanýar.
